Á Jaðri eru tveggja ára börn með breytilegan vistunartíma, frá fjórum tímum upp í níu tíma vistun. Grunntíminn er frá átta til tólf og eitt til fimm.  Stöðugildi starfsmanna deildarinnar reiknast út frá fjölda barna ár hvert. 

Í Vallarseli er unnið samkvæmt Aðalnámskrá leikskóla þar sem námssviðin eru alls sex. Þau eru hreyfing, málrækt, myndsköpun, tónlist, náttúra og umhverfi, menning og samfélag.

Meginmarkmið samkvæmt Aðalnámskrá eru m.a.

ü      að efla siðgæði og leggja grundvöll að því að börn verði sjálfstæðir, hugsandi, virkir og ábyrgir þátttakendur í lýðræðisþjóðfélagi

ü      að gefa börnum kost á að taka þátt í leik og starfi og njóta fjölbreyttra uppeldiskosta

ü      að rækta tjáningar- og sköpunarmátt barna í þeim tilgangi að styrkja sjálfsmynd þeirra, öryggi og getu til að leysa mál sín á friðsamlegan hátt.

Í gegnum allt okkar starf á Jaðri erum við að vinna með áhersluþætti Aðalnámskrárinnar.  Í starfinu er reynt að fylgja þessum námssviðum eftir en í hópastarfi er lögð áhersla á að hafa þau að leiðarljósi.

Athafnir daglegs lífs

Rauði þráðurinn í gegnum allt daglegt starf er að skapa öryggi hjá börnunum og að efla sjálfstæði þeirra.

Við komu og brottför er lögð áhersla á að hverju barni sé heilsað og það kvatt með nafni.  Mikilvægt er fyrir líðan hvers barns að það finni að það sé velkomið í leikskólann.

Í fataherbergi er lögð áhersla á að börnin læri að klæða sig úr og í sem mest sjálf.  Þau eru einnig hvött til þess að ganga snyrtilega frá fatnaði sínum og að hjálpa hvert öðru.  Þau fá þá aðstoð sem þörf er á en eru hvött á jákvæðan hátt til sjálfsbjargar. Til að gera þessa stund sem besta þá fara börnin fram í litlum hópum í fataherbergið.

Á salerni eru börnin hvött til þess að bjarga sér á sem mestan hátt sjálf en starfsfólk er til staðar fyrir þau ef þess er þörf.  Eru þau einnig hvött til þess að gæta fyllsta hreinlætis.
Við matarborðið er lögð áhersla á  góða borðsiði og að börnin geti bjargað sér að mestu við matarborðið.  Reynt er að nýta hádegisverðinn og kaffitímann sem rólega stund með börnunum, þar sem við njótum þess að borða  og ræða málin.
Hvíldartími eftir hádegisverð fara börnin að leggja sig þar sem hlustað er á  rólega tónlist.

Útivera er á hverjum degi nema eitthvað sérstakt standi í vegi fyrir því. Þau börn, sem eru allan daginn í leikskólanum og sofa ekki, stendur til boða að velja hvort þau vilja fara út fyrir eða eftir hádegi. Í útiveru er lögð áhersla á að börnin fái að leika sér á frjálslegan hátt án mikilla afskipta starfsfólks sem tekur þó þátt í leiknum ef svo ber undir.  Útileiksvæði leikskólans býður upp á fjölbreytta möguleika til allskonar hreyfileikja, bæði sjálfsprottinna og skipulagðra.

Hólf barnanna eru merkt með nafni, mynd af barninu og einnig dýramynd sem er tákn barnsins.

Grófhreyfing

Börn hafa ríka þörf fyrir að hreyfa sig frjálst og óhindrað.  Öll hreyfing stuðlar að andlegri og líkamlegri vellíðan. Hreyfistundir eru einu sinni í viku í sal leikskólans 30 mín hvert skipti.

Hvað viljum við fá fram?

ü     að barnið hreyfi sig frjálst og óhindrað

ü     að barnið skynji líkama sinn og nái betri stjórn á hreyfingum sínum

ü     að barnið hreyfi sig eftir mismunandi takti

ü     að barnið geti stöðvað og breytt hreyfingu

ü     að barnið geti hoppað jafnfætis

ü     að barnið renni, róli og hjóli

1-2 ára

ü      að barnið geti staðið upp úr setu

ü      að barnið geti gengið óstutt

ü      að barnið geti bakkað niður stiga með fæturna á undan

2-3 ára

ü      að barnið geti gengið afturábak

ü      að barnið geti steypt sér í kollhnís með hjálp

ü      að barnið geti sparkað í bolta

Fínhreyfing

Þjálfun fínhreyfinga er mikilvæg fyrir samhæfingu augna og handa.

Hvað viljum við fá fram?

ü      að barnið nái færni í notkun á leir og öðrum efnivið (stöðuskyn)

ü      að barnið noti þvergrip

ü      að barnið borði með gaffli

ü      að barnið grípi stóran bolta með báðum höndum

ü      að barnið byggi turn úr 6-8 kubbum

ü      að barnið teikni hring eftir fyrirmynd

ü      að barnið byrji að klippa

Málrækt

Í málræktinni viljum við að barnið nái góðu valdi á íslenskri tungu og notkun málsins svo að það nýtist því á auðveldan hátt í öllum samskiptum.
Málörvun er fléttað inn í alla þætti leikskólastarfsins.
 

Hvað viljum við fá fram?

ü      að auka orðaforða og málskilning barnsins

ü      að barnið nái færni í að tjá sig á frjálslegan hátt

ü      að barnið læri virka hlustun

 1-2 ára

ü      að barnið biðji um meira

ü      að barnið geti bent á þrjá líkamshluta á sjálfum sér þegar það er spurt

ü      að barnið skilji ,,réttu mér’’ , ,,sýndu mér’’

ü      að barnið segi nafnið sitt

2-3 ára

ü      að barnið geti svarað spurningum t.d ,,hvað ert þú að gera’’

ü      að barnið geti svarað ,,hvar’’ spurningu

ü      að barnið spyrji ,, hvað er þetta’’

ü      að barnið geti sagt til um kyn sitt

ü      að barnið rétti fleiri en 1 hlut þegar notuð er fleirtala

Myndsköpun

Börn á leikskólaaldri  hafa ríka þörf fyrir að tjá sig með myndmáli á skapandi hátt.  Börnin eiga að fá að teikna, mála og móta frjálst eftir eigin hugmyndum á sinn sérstæða hátt.  Leikskólanum ber að sjá börnunum fyrir fjölbreyttum efnivið til myndsköpunar og hvetja og leiðbeina án mikilla beinna afskipta.
 

Hvað viljum við fá fram?

ü      að örva sköpunarhæfni og gleði

ü      að örva hugmyndaflug og skapandi tjáningu

ü      að þjálfa samhæfingu augna og handa

ü      að barnið loki formum í krassteikningum

ü      að barnið læri að þekkja litina

Tónlist

Þar sem tónlistin er okkar sérstaða, er tónlistarstjóri sem sér um kennslu einu sinni í viku og kennir börnum og starfsfólki. Hann þjálfar hjá okkur hlustun, söng, næmni fyrir hryn og hljóðum og grunnhugtök í tónlist. Þá er farið í leiki sem byggjast  á tónlist og hreyfingu. Börnin fá að spila á hin margvíslegustu hljóðfæri.   Unnið er með tónlistina í samverum og hópastarfi.                                    

Hvað viljum við fá fram?

ü      að barnið öðlist næmni fyrir hljóðum, hreyfingu og hrynjanda

ü      að barnið nái að tengja tóna og hryn við reglubundnar hreyfingar

ü      að örva tónlistargleði

ü      að barnið læri söngtexta og þulur

ü      að veita barninu tækifæri til að njóta tónlistar og tengja hana öðrum listformum s.s myndsköpun, dansi o.fl.

Náttúra og umhverfi

Í leikskólanum fer fram fræðsla um náttúruna og umhverfið og hvernig okkur ber að ganga um.  Við förum í ferðir til að kynnast margbreytileika okkar nánasta umhverfis og kennum börnunum að nota þau tækifæri sem gefast til tilrauna og nánari athugana.

Hvað viljum við fá fram?

ü      að börnin fræðist um náttúruna, umhverfið og verndun þess

ü      að vekja virðingu barnanna fyrir náttúrunni og fegurð hennar

Menning og samfélag

Leikskólanum ber að nýta þau menningarlegu og félagslegu tækifæri sem umhverfi hans og staðsetning gefur kost á og gefur þannig börnunum af ólíku bergi brotnu tækifæri til að kynnast hvert öðru og því sem við höfum upp á að bjóða, bæði innan leikskólans og utan.  Til þess notum við nýjustu tækni um leið og við höldum í gamlar hátíðir og hefðir.

 Hvað viljum við fá fram?

ü      að kynnast hátíðum,gömlum og nýjum hefðum

ü      að virkja áhuga á menningu og samfélagi

ü      að bera virðingu hvert fyrir öðru, sama hver uppruni eða þjóðfélagsleg staða er

Leiðir að ofangreindum markmiðum eru í öllu okkar daglega starfi og við grípum þau tækifæri sem skapast hverju sinni, í samveru, í hópastarfi, við matarborðið eða í fataherbergi svo fátt eitt sé nefnt.

 Hópastarf
Hópastarf er tvisvar sinnum í viku,  30 mínútur í senn.  Unnið er með námssviðin  í hópastarfi, þar sem lögð er áhersla á að börnin fái sem mesta fræðslu í gegnum leik og starf. Hver hópur hefur fastan hópstjóra, svo að börnin öðlist öryggi og er hann þá einnig meðvitaðri um hvar öll börnin í hans hóp eru stödd í þroska. Þannig getur hvert og eitt barn unnið á sínum forsendum og á sínum hraða.   Markmiðin með hópastarfi eru m.a.:

ü      að barnið læri að bera virðingu fyrir verkum og skoðunum sínum og annarra

ü      að stuðla að traustum og hlýjum samskiptum milli barnanna

ü      að hvetja barnið til þess að sýna öðrum virðingu og umburðarlyndi

ü      að örva hugmyndaflug barnsins og skapandi tjáningu

ü      að hvetja barnið til sáttfýsi og samvinnu

Samvera
Í samveru leggjum við áherslu á rólega stund, þar sem við lesum, syngjum, förum í leiki og lærum tákn með tali. (TMT)
Markmiðið með samveru er:

ü      að börnin læri að sitja kyrr og hlusta                                                                

ü      að þau taki þátt í samverustundinni

ü      að barnið læri að nota TMT

Val
Valið er rammi utan um frjálsa leikinn. Þar geta börnin valið sér þau svæði sem þau vilja leika sér á. Leikurinn er hornsteinn leikskólastarfsins og mikilvægasta náms- og þroskaleið allra barna. Í leik læra þau margt sem enginn getur kennt þeim. Við bjóðum alltaf uppá sömu svæðin en reynum að  hafa fjölbreyttan efnivið.                                                                      

Markmiðin með vali eru m.a.:

ü      að hafa val um hvar leikið er og við hverja

ü      að leika sér í litlum hóp

ü      að velja sér efnivið við hæfi

ü      að efla samstöðu og samvinnu í hópnum

ü      að börnin læri að bíða eftir að röðin komi að sér

Könnunarleikur

Könnunarleikurinn verður einu sinni í viku. Könnunarleikur byggist á því að börnin leika með allskonar hversdagslega hluti og ílát (ekki plastleikföng úr búðum).  Þar fá börnin að vera “litlir vísinda- menn/konur” og uppgötva mismunandi eiginleika hlutanna með endalausum tilraunum.  Í þessum stundum starfa börnin af eigin hvötum án þess að fullorðnir stýri þeim.                                                                

Markmiðið með könnunarleik er:

ü      að leika sér í litlum hópi

ü      að börnin uppgötvi að möguleikar efniviðarins séu óþrjótandi

ü      að engin ein lausn sé rétt

Einingakubbar

Einigakubbaleikur er byggður upp eins og könnunarleikur.

Kubbar eru skapandi efniviður og það sem börn byggja minnir oft á fyrirmyndir úr umhverfi þeirra, t.d. hús, bíll, flugvél o.s.frv.

Kubbabyggingar eru mikilvægar fyrir þróun vitsmunaþroskans. Í kubbaleik gefst gott tækifæri fyrir börn að endurskapa umhverfi sitt og þær hugmyndir sem þau hafa um það. Þessi hæfileiki til að upplifa og skapa er mikilvæg undirstaða afstæðrar hugsunar.

Hönnun kubbanna er stærðfræðilega rétt, því öðlast börn sem leika með þá skilning sem er grundvöllur rökrænnar hugsunar. Þau læra um stærð, lengd, form, fjölda, röðun, rými og þyngd þegar þau byggja úr kubbunum og við tiltektina.

Markmiðið með einingakubbum er:

 ü      að leika sér í litlum hóp

ü      að efla rökhugsun

ü      að þjálfa rúmskynjun

Tákn með tali (TMT)
Tákn með tali (TMT) er tjáningarform ætlað heyrandi fólki sem á við mál- eða talörðugleika að stríða. Það byggist á samblandi af látbragði, táknum og tali.  Börnin læra táknið fyrir myndina sem þau eiga, þau syngja lög með táknum og einnig læra þau einföld tákn. Táknin eru notuð sem stuðningur við talmál og táknuð eru lykilorð setninga
Markmiðið með vinnu með tákn með tali er:

ü      að börnin læri fleiri en eina boðskiptaleið

Göngu- og vettvangsferðir
Göngu- og vettvangsferðir eru m.a. farnar í hópastarfi. Tengjast þær gjarnan því þema sem er í gangi hverju sinni. Til að byrja með verður áherslan á að kenna börnunum að ganga á gangstéttinni og fylgjast að yfir götur.  Einnig eru ferðirnar nýttar til að safna efnivið til skapandi starfs. Börnin eru æfð í þeim umferðarreglum sem þau þurfa að kunna til þess að vera þátttakendur í umferðinni á öruggan hátt.                                            

Markmið með gönguferðum er:

ü      að börnin kynnist umhverfi sínu

ü      að læra að forðast hættur í umferðinni